ബംഗ്ലാദേശിനെതിരായ ഹൈദരാബാദ് ടി20 മത്സരത്തിൽ ഇന്ത്യ ചരിത്രപരമായ പ്രകടനം നടത്തിയപ്പോൾ, മലയാളി താരം സഞ്ജു സാംസൺ ലോക ക്രിക്കറ്റിന്റെ തന്നെ ചരിത്രപുസ്തകങ്ങളിൽ ആണ് ഇടം നേടിയത്. ഓപ്പണർ ആയി എത്തിയ സഞ്ജു സാംസൺ 47 പന്തുകളിൽ നിന്ന് 11 ഫോറുകളുടെയും 8 സിക്സുകളുടെയും അകമ്പടിയോടെ 111 റൺസ് നേടി സെഞ്ച്വറി പ്രകടനം പുറത്തെടുത്തു. ഇപ്പോൾ തന്റെ റെക്കോർഡ് പ്രകടനത്തിന് ശേഷം പ്രതികരിച്ചിരിക്കുകയാണ് സഞ്ജു സാംസൺ.
സഞ്ജുവിന്റെ പ്രകടനത്തെ അഭിനന്ദിച്ചുകൊണ്ട് നേരത്തെതന്നെ ലോകത്തിന്റെ വിവിധ കോണുകളിൽ നിന്ന് പ്രതികരണങ്ങൾ എത്തിച്ചേർന്നിരുന്നു. ഇപ്പോൾ, സോഷ്യൽ മീഡിയയിൽ സഞ്ജു തന്റെ സെഞ്ച്വറി നേടിയ ശേഷമുള്ള ഒരു സെലിബ്രേഷൻ ചിത്രം പങ്കുവെച്ചുകൊണ്ട്, “ഞാൻ വിശ്വസിച്ചു!!” എന്ന ക്യാപ്ഷൻ നൽകിയിരിക്കുകയാണ്. ഇതിനോടകം സഞ്ജു കടന്നുപോയ പ്രതിസന്ധി ഘട്ടങ്ങളെ എല്ലാം സ്മരിക്കുന്ന ഒരു ക്യാപ്ഷൻ ആയിരുന്നു ഇത്. സഞ്ജുവിന്റെ ഈ പ്രതികരണത്തിന് മറുപടിയായി
അദ്ദേഹത്തിന്റെ ഇന്ത്യൻ ടീമിലെ സഹതാരങ്ങളും മുൻ ഇന്ത്യൻ താരങ്ങളും വിദേശ താരങ്ങളും എല്ലാം എത്തി. “അതുപോലെ തന്നെ [ഞാനും വിശ്വസിച്ചു],” എന്ന് ഇന്ത്യയുടെ ടി20 ക്യാപ്റ്റൻ സൂര്യകുമാർ യാദവ് പ്രതികരിച്ചപ്പോൾ, “ഗംഭീരം” എന്നാണ് ഇംഗ്ലണ്ട് വൈറ്റ് ബോൾ ക്യാപ്റ്റൻ ജോസ് ബട്ലറുടെ പ്രതികരണം. “മികച്ച പ്രകടനം സഹോദരാ,” എന്നാണ് മുൻ ഇന്ത്യൻ താരം ശിഖർ ധവാൻ സഞ്ജുവിന്റെ ഇന്നിങ്സിനെ പ്രശംസിച്ചത്. ഇന്ത്യയുടെ വെടിക്കെട്ട് ഓപ്പണർ ശിഖർ ധവാനെ
അനുസ്മരിപ്പിക്കുന്ന പ്രകടനമാണ് സഞ്ജു ബംഗ്ലാദേശിനെതിരെ നടത്തിയത്. അതുകൊണ്ടുതന്നെ ധവാന്റെ പ്രതികരണം ശ്രദ്ധേയമാണ്. രാജസ്ഥാൻ റോയൽസിലെ സഞ്ജുവിന്റെ സഹതാരമായ വെസ്റ്റ് ഇൻഡീസ് ബാറ്റർ ശിമ്രാൻ ഹെട്മയർ, മുൻ ഇന്ത്യൻ ഫുട്ബോളർ സി കെ വിനീത്, സഞ്ജുവിന്റെ ഐപിഎൽ ഫ്രാഞ്ചൈസിയായ രാജസ്ഥാൻ റോയൽസ് തുടങ്ങിയവരെല്ലാം തന്നെ ആരാധകർക്കൊപ്പം അവരുടെ സന്തോഷം പങ്കുവെച്ചു. Shikhar Dhawan hails Sanju Samson century
